Gebirgstrachten – Erhaltungsverein "D`Weikertstoana" e.V.

Mit vui Humor, Herzbluat und nu mehr Gaudi hod da Trachtenverein GTEV D’Weikertstoana Weißbach noch 16 Joh´, am 7. Februar 2026, wieder a zünftige Faschingshochzeit auf´d Fiaß gestellt! G’heirat ham dabei – ganz standesgemäß – „de oiwei wilde Brunzhilde und „da Bumbsbär Blasimir“.

v.l.n.r.: Bräutigameltern: Lisi Holzner & Flori Öttl; Bräutigam Blasimir (Lena Holzner) & Braut Brunzhilde (Jonas Öttl); Brauteltern: Anderl Holzner, Christine Freiwang

Koa Hochzeit ohne Brautladen, Kranzbind´n, Junggesellenabschied & Brautliedsingen

…. oisse natürlich „verkehrt umme“

Nachdem die Planungen & Vorbereitungen seit Herbst 2025 auf Hochtouren g´laffn san, is am 24. Januar 2026 da Startschuss gfoin: des traditionelle „Brautladen“ hod stattg´funden. Unser Hochzeitslader Seppi Wenzl hod höchstpersönlich die Braut mit de Brauteltern, an Bräutigam mit seine Eltern, d´Ehrenmutter mit Brautführer sowie die Vorstände der Weißbacher Ortsvereine und die Aktivengruppe des Weißbacher Trachtenvereins eiglod´n – ganz wia´s da boarische Brauch eben verlangt. Aber… g´warnt worden is a jeder: „kemma miasst´s gwieß, weil sunst is der ganze Schmarn heid umasunst!“.

Wos natürlich a zum Pflichtprogramm bei jeder Hochzeit gehört: as Kranzbind´n. A Brauch, der für Glück, Segen und a langes Eheleben steht – oder a wenigstens dafür, dass de Kranzbinderinnen a Rund´n Schnaps & a guade Brotzeit griang! De „Mädels“ von da Aktivengruppe ham am 30. Januar 2026 mit vui Fleiß zwoa scheene Kränze für Braut und Bräutigam ´bundn & aufg’stellt.Doch wos wär a Hochzeit ohne gscheid´n Abschied vom Junggesellendasein? Mit de Diandl´n & Buam vom Weißbacher Trachtenverein san Brunzhilde und Blasimir – natürlich sauber vo´einander getrennt – auf Dorfroas durch Weißbach ganga. Bei de unterschiedlichsten Aufgaben rund um’s Dorf- und Vereinsleben hod as Brautpaar ihr „Können“ unter Beweis stellen miass´n – ganz im Sinn vom „echten Weißbacher Vereinsleben“. Im Anschluss is dann mit beide Junggesellen-Gruppen in da Weißbacher Vereinshütte ausgiebig g´feiert worden.
„Heut ist die letzte Nacht, junge Braut gib Acht“ – hods am 6. Februar Aufnocht dann nu g´hoassn – ohne Brautliadsinga, koa Hochzeit.

Hochzeit am 7. Februar 2026

„Was ich heute hier verbunden habe, möge der Herrgott morgen bitte wieder trennen“

Wia sich’s für a richtige Hochzeit eben so g´hört, is as Brautpaar um 6 Uhr von de Weißbacher Buam aufg´weckt worden. Während die Gäste, Zuschauer und Mitwirkenden ab 10:30 Uhr beim „Warm-up“ an der Trachtenhütte scho a bisserl in Stimmung kemma san, hod da Einzug vom Brautpaar für Aufsehen g´sort und dabei zoagt, dass wahre Romantik ned auf vier Räder, sondern auf an ordentlichen Dieselmotor setzt. Angeführt vo da Weißbacher Musikkapelle is da festliche Kirchenzug in Richtung Kurpark los zog´n – wo da Hochzeitszug mit an satten „Bumm-Bumm-Klack“ von de Weißbacher Böllerschützen empfangen word’n is – schließlich soll a jeder im Dorf wiss´n, dass do grad a Verbindung fürs Leben (oder zumindest für an Fasching) ei´ganga wird. Mit Humor, vui Witz und no mehr Applaus der zahlreichen Zuschauer hod Pfarrer „Floritsch Holzitsch“ die Trauung obghoit´n. Professionell ausgschaut hods – aber vor allem oans wars: a gescheite Gaudi!

Wia sich´s ghört – und, wos in dem Fall nu wichtiger is, wie de Trauung selbst – is im Anschluss im Hotel Alpenglück mit stimmungsvoller Unterhaltung der Musikkapelle Weißbach ausgiebig g´feiert worden. Bei Musi, Tanz, Essen und bester Stimmung ham unter anderem die Weißbacher Ortsverein, die Jugend- & Aktivengruppe, der Inzeller Trachtenverein „de bucklige Inzeller Verwandschaft von da Braut“ und der Schneizlreuther Trachtenverein mit lustige & einfallsreiche Aufführungen für no´ mehr Unterhaltung g´sorgt. Doch damit war da Tag no´ lang ned vorbei: Nach da Hochzeitsfeier hod si de ganze Gesellschaft im Gasthof Stabach zum traditionellen Weinstüberl zammg’fundn – as Postamt Trio hod so richtig für guade Stimmung g’sorgt, sodass Oid und Jung nu ausgloss´n feiern ham kinna!

Mit so ´na Faschingshochzeit wead wieder amoi bewiesen, dass bayrisches Brauchtum, Z´sammahoit und a „guade Portion Humor“ einfach zamm´ghean! Schee war’s!

Mia, da Trachtenverein D´Weikertstoana Weißbach, mecht´n uns auf diesem Weg numoi bei allen Mitwirkenden, Zuschauern, vor allem Helfern und beim Hotel Alpenglück sowie Gasthof Stabach herzlich für die Unterstützung & Zusammenarbeit bedanken!

Bildergalerie